Monday, January 18, 2010

ഉണര്‍ച്ച രേഖപ്പെടുന്നത്‌

വേലിയേറ്റത്തിന്‍ മദിപ്പില്‍
കരകയറിയെത്തും കടല്‍ജീവന്‍,
വെയിലലിഞ്ഞ നിറങ്ങള്‍ നീന്തുമാഴങ്ങളെ,
കൗതുകം തൊട്ട കടല്‍പ്പച്ചയെ,
ഉള്ളറകള്‍ ഊട്ടിവളര്‍ത്തുന്ന പവിഴപ്പാടങ്ങളെ,
മുത്തുച്ചിപ്പിയുടെ അകക്കണ്‍പ്രണയത്തെ,
മണ്‍തിട്ടയില്‍ അമര്‍ത്തിയമര്‍ത്തിയെഴുതി,
തിരയിട്ട മുഖപടത്തില്‍
പതിനാലാം രാവു തെളിയിയ്ക്കും

ആ നിമിഷം വരെ
അടിഞ്ഞുകൂടിയ പരിഭവക്കറകള്‍
ആലിംഗനശതങ്ങളില്‍
അലിയിച്ചൊഴുക്കിക്കളയും
ഉടലാകെ നക്ഷത്രം വിതറും

ഓളത്തിന്‍ ഉയിര്‍പ്പുകള്‍
വിരല്‍കോര്‍ക്കും പൂഴിയില്‍ നിന്നും
വേലിയിറക്കത്തിന്‍ കിതപ്പ്‌
ഞണ്ടിന്‍ മാളങ്ങളിലൂടെ നിലവറയിലേയ്ക്കൂര്‍ന്നിറങ്ങുമ്പോള്‍
അയഞ്ഞ താളത്തില്‍
ജലരേഖകള്‍ തെറുത്തെടുത്ത്‌
തീരത്ത്‌ നിലാവുണങ്ങും

നനഞ്ഞ ഓര്‍മ്മകളില്‍,
മുഖമടര്‍ന്ന കക്കയും
വക്കുപൊട്ടിയ ശംഖും
കാലദേശങ്ങളുടെ കണക്കുമായി
കുരുങ്ങിക്കിടക്കുകയാകുമപ്പോഴും...

*********************

14 comments:

അപ്പു said...

നനഞ്ഞ ഓര്‍മ്മകളില്‍,
മുഖമടര്‍ന്ന കക്കയും
വക്കുപൊട്ടിയ ശംഖും
കാലദേശങ്ങളുടെ കണക്കുമായി
കുരുങ്ങിക്കിടക്കുകയാകുമപ്പോഴും.

വളരെ ശരിയാണത്. ഇപ്പോള്‍ പക്ഷേ അവയേയും പായ്ക്കറ്റിലാക്കി വാങ്ങാന്‍ കിട്ടുമല്ലോ മറുനാട്ടിലും.

രാമചന്ദ്രന്‍ വെട്ടിക്കാട്ട്. said...

ഓര്‍മ്മകള്‍ എവിടെയെക്കെയോ കുരുങ്ങിക്കിടക്കുകയാണിപ്പൊഴും..

ഉപാസന || Upasana said...

koLLaam akkaa
:-)

ശ്രീ said...

അവയ്ക്കും ഒരു നല്ല കാലത്തിന്റെ ഓര്‍മ്മകള്‍ മാത്രം ബാക്കിയുണ്ടാകും.

ഹരിയണ്ണന്‍@Hariyannan said...

ഞാനും കടലായി..
കവിതയോടൊപ്പം ഒഴുകി...
ഓര്‍മ്മകളില്‍ മുഖമടര്‍ന്ന കക്കകള്‍ കണ്ടു...
ശബ്ദമൊഴിഞ്ഞ ശംഖുകളും കണ്ടു!

ഇടക്കെപ്പോഴെങ്കിലും ഒരു സുനാമിയായി എല്ലാറ്റിനേയും നശിപ്പിക്കണമെന്നുതോന്നിയിട്ടും
കടല്‍ഭിത്തിക്കുള്ളില്‍ അടിച്ചുതകരുന്നു.

ഞാന്‍ എന്റെ ഉണര്‍ച്ച രേഖപ്പെടുത്തുന്നു.

ഇത്തിരിവെട്ടം said...

കാലത്തിന്റെ കൈപ്പിടിയില്‍ നിന്ന് കുതറിയോടനല്ലേ‍ ഓര്‍മ്മകളും സ്വപ്നങ്ങളും...

ഏ.ആര്‍. നജീം said...

നനഞ്ഞ ഓര്‍മ്മകളില്‍,
മുഖമടര്‍ന്ന കക്കയും
വക്കുപൊട്ടിയ ശംഖും
കാലദേശങ്ങളുടെ കണക്കുമായി
കുരുങ്ങിക്കിടക്കുകയാകുമപ്പോഴും...

അതങ്ങിനെ കിടക്കും യുഗങ്ങളോളം, മറവിയുടെ മാറാല വരിഞ്ഞുകെട്ടും വരെ

സോണ ജി said...

' ഉണര്‍ച്ച രേഖപ്പെടുന്നത്'- എന്ന താങ്കളുടെ കവിത ശകലം ഞാന്‍ വായിച്ചു.എനിക്ക് തോന്നിയത് കുറിക്കട്ടെ :
കവയിത്രിയുടെ കല്‍പ്പനയാകുന്ന മനസ്സ് തിരയുടെയൊപ്പം വേലിയേറ്റ ,വേലിയിറക്കത്തില്‍ വിഹരിക്കുന്ന മായ കാഴ്ചയാണ്.അവിടെ നിന്നും അതിന്റെ പ്രയാണം നിലക്കുന്നില്ല..അത് കൌതുകത്തിന്റെ പച്ചപ്പ് ഉള്ളറകളില്‍ തിരയുന്നുണ്ട് ആ തിരച്ചിലില്‍ അകകണ്‍പ്രണയവും ചിപ്പിയില്‍ കാണുക സ്വാഭാവികം ..നിദാനം കല്‍പ്പനയല്ലേ ..എന്തും ആവാമല്ലോ..? പ്രണയത്തിലും ,ജീവിതത്തിലും പരിഭവ കറുപ്പ് പതിവാണല്ലോ അത് തിരയില്‍ സന്നിവേശിപ്പിക്കുമ്പോള്‍ കറുത്ത തിരമാലകള്‍ ആവാം..ഈ തിരയുടെ യാത്ര കര കവിഞ്ഞു പൂഴിയിടം വരേ എത്തുന്നുണ്ട് യാത്ര കിതപ്പോടെ പിന്‍ വലിയുന്ന തിര ഞ്ഞണ്ടിന്‍ മാളങ്ങളുടെ പുറത്തു കൂടെയാണ്..തിരയുടെ പ്രണയചുംബനം തീര്‍ത്ത നനവ് പിന്നീട് നിലാവാണു്‌ ഉണക്കുന്നത്..പ്രണയത്തിന്റെ വേലിയേറ്റവും, വേലിയിറക്കവും നല്ല ഭാവന സാന്ദ്രമായി കവയിത്രി ചിത്രീകരിച്ചിരിക്കുന്നു..
കാലം കവച്ചു വെച്ച ഗണിതങ്ങള്‍ വാര്ദ്ധക്യത്തില്‍ നനഞ്ഞോര്‍മ്മകളില്‍ മാത്രം തങ്ങിനില്‍ക്കുന്നു..
മുഖമടര്‍ന്ന കക്കയുംവക്കുപൊട്ടിയ ശംഖും-വാര്‍ദ്ധക്യത്തിന്റെ ബിംബകല്‍പ്പന തീര്‍ക്കുന്നു...
നന്ദി ചന്ദ്രകാന്തം! തീരത്ത് നഷ്ടപ്രണയത്തിന്റെ ഓര്‍മ്മകളൂമായി തിരയെണ്ണാന്‍ അവസരം തന്നതിനു...
ജലരേഖകള്‍ തെറുത്തെടുത്ത്‌-എന്നതിനു്‌ പകരം ജലപായ തെറുത്തെടുത്ത് എന്നാക്കിയാല്‍ കൊള്ളാം എന്ന് തോന്നി തെറ്റായെങ്കില്‍ മാപ്പ്.ഞാനീ വഴി വന്നിട്ടില്ല.ഈ നാട്ടുകാരനും അല്ല.

മനോഹര്‍ മാണിക്കത്ത് said...

മുഖമടര്‍ന്ന കക്കയും
വക്കുപൊട്ടിയ ശംഖും
കാലദേശങ്ങളുടെ കണക്കുമായി
കുരുങ്ങിക്കിടക്കുകയാകുമപ്പോഴും...

കൊള്ളാം ഈ പ്രയോഗം

Ranjith chemmad said...

"നനഞ്ഞ ഓര്‍മ്മകളില്‍,
മുഖമടര്‍ന്ന കക്കയും
വക്കുപൊട്ടിയ ശംഖും
കാലദേശങ്ങളുടെ കണക്കുമായി
കുരുങ്ങിക്കിടക്കുകയാകുമപ്പോഴും..."
ഇഷ്ടായീ....

പഴയ രചനയായതുകൊണ്ട് തന്നെ,
ശിലാഘടനയുടെ വ്യതിയാനരാഹിത്യത്തില്‍
വേവലാതിപ്പെടുന്നില്ല.

പാമരന്‍ said...

"തീരത്ത്‌ നിലാവുണങ്ങും.." that was the best.

കാവലാന്‍ said...

ആസ്വാദനത്തിന്റെ അലകള്‍ ഉള്ളിലുണര്‍ത്തുന്ന വരികള്‍.

ആശംസകള്‍.

ഓ.ടി. ആസ്വാദനക്കുറിപ്പിലെ (വയ്യാ)വേലിയേറ്റത്തില്‍ കവിത ഒലിച്ചു പോകുന്നു സോണ.

ഗിരീഷ്‌ എ എസ്‌ said...

ചന്ദ്രേ...
ഏറെ കാലത്തിന്‌ ശേഷം ഈ ഭൂമികയില്‍...
കവിത പതിവ്‌ പോലെ തീക്ഷ്‌ണം...


ആശംസകള്‍

സോണ ജി said...

ശ്രീ ശ്രീ കാവലാന്‍ ചേട്ടാ...
കവിത വയ്യ (വേലിയേറ്റത്തില്‍ ) ഒലിച്ചു പോയാലും പേടിക്കണ്ടന്നേയ് ..തിര കൊണ്ടു വന്നു തരും തിരികേ , അല്ലെങ്കില്‍ മൂന്നാം പക്കം കരക്കടിയും..കടലമ്മ ചതിക്കില്ല. ഉറപ്പാ ! നന്ദി വീണ്ടും കാണാം !